សាររំលែកទុក្ខ​របស់​ថ្នាក់ដឹកនាំ​បារាំង​ចំពោះ​សោកនាដកម្ម​ក្នុង​ព្រះរាជពិធី​បុណ្យ​អុំទូក

ក្រោយពី​សោកនាដកម្ម​នៃ​ព្រះរាជពិធី​បុណ្យ​អុំទូក​ដែល​បាន​កើត​ឡើង​កាលពី​ថៃ្ងទី​22​វិច្ឆិកា ថ្នាក់ដឹកនាំ​ជាន់ខ្ពស់​បំផុត​នានា​របស់​ប្រទេស​បារាំង​បាន​ផ្ញើសារ​រំលែកទុក្ខ​ជាផ្លូវការ​ថ្វាយ​ព្រះករុណា​ព្រះបាទ​សមេ្តច​ព្រះបរមនាថ នរោត្តម សីហមុនី ព្រះមហាក្សត្រ​នៃ​ព្រះរាជា​ណាចក្រ​កម្ពុជា និង​ជូន​សមេ្តច ហ៊ុន សែន នាយករដ្ឋមន្រ្តី​នៃ​រាជរដ្ឋាភិបាល​កម្ពុជា ។

នៅក្នុងស្ថានភាព​ដ៏កៀ្រមក្រំនេះ លោក​នីកូឡា សាកូហ្ស៊ី (Nicolas Sarkozy) ប្រធានាធិបតី​នៃ​សាធារណរដ្ឋ​បារាំង បាន​បង្អាញ​ពីអារម្មណ៍​រន្ធត់​ឥត​ឧបមា​របស់​លោក​ថ្វាយ​ព្រះមហាក្សត្រ​នៃ​ព្រះរាជាណាចក្រ​កម្ពុជា ដោយ​លោក​គូស​បញ្ជាក់​ថា : « ទូល​បង្គំ​ជ្រាប​យ៉ាង​ច្បាស់​ពីទំហំ​នៃ​ការឈឺចាប់​របស់​ព្រះរាជាណាចក្រ​កម្ពុជា​ចំពោះ​ការបាត់បង់​អាយុជីវិត​ដ៏ច្រើន​សន្ធឹក​សន្ធាប់នេះ » ។ លោកប្រធានាធិបតី​បានសំដែង​នូវសមានទុក្ខ​របស់​លោក​ចំពោះ​ប្រជាជន​កម្ពុជា ថ្នាក់ដឹកនាំ​រាជរដ្ឋាភិបាល គ្រួសារសព និង​អ្នករងរបួស​ទាំងអស់​នៅក្នុង​គ្រោះថ្នាក់​នេះ។ ក្នុងនាម​ប្រជាជន​បារាំង និង​ក្នុងនាម​លោកផ្ទាល់ លោក​ប្រមុខរដ្ឋ​សូមចូលរួម​រំលែក​ទុក្ខដ៏កៀ្រមក្រំ​ជាមួយ​សមេ្តច​នាយករដ្ឋមន្រ្តី ហ៊ុន សែន ចំពោះ​ជនរងគ្រោះ​ដ៏ច្រើន​នៃ​សោកនាដកម្ម​នេះ ។

ចំណែកលោក​នាយករដ្ឋមន្រ្តី​ហ្រ្វង់ស្វ័រ ហ្វីយ៉ុង (François Fillon) វិញ លោកបាន​គូសបញ្ជាក់​ដល់សមេ្តច ហ៊ុន សែន ពីការ​អាណិត​អាសូរ និង​សាមគ្គីភាព​ដ៏ជ្រាលជ្រៅ​បំផុត​របស់​លោក​ចំពោះ​ប្រទេស​កម្ពុជា​នៅក្នុង​កាលៈទេសៈ​ដ៏សែន​ខ្លោចផ្សា​នេះ ។ លោកក៏បាន​លើកឡើង​ផងដែរ​ពីមនោសពោ្ចតនា​មិត្តភាព​យ៉ាង​ជ្រាលជ្រៅ​រវាង​ប្រជាជន​បារាំង និង​កម្ពុជា ដែល​ដក់ជាប់​ក្នុង​អារម្មណ៍​របស់​លោក ។

រីឯលោកស្រីទេសរដ្ឋមន្រ្តី មីឆែល អាលីយ៉ូ-ម៉ារី (Michèle Alliot-Marie) រដ្ឋមន្រ្តី​ក្រសួង​ការបរទេស និង​កិច្ចការ​អឺរ៉ុប បានផ្ញើ​សាររំលែកទុក្ខ​មួយ​ជូន​លោកឧបនាយករដ្ឋមន្រី្ត ហោ ណាំហុង រដ្ឋមន្រី្ត​ក្រសួង​ការបរទេស និង សហប្រតិបត្តិការ​អន្តរជាតិ​នៃ​ព្រះរាជាណាចក្រកម្ពុជា។ កាលពី​​ថៃ្ងអង្គារ លោកស្រី​បាន​ប្រាប់​ដល់​អ្នកសារព័ត៌‌មាន​ថា លោកស្រី​យល់យ៉ាង​ច្បាស់​ពីទំហំ​នៃ​សោកនាដកម្ម​នេះ ដែល​ធ្វើឲ្យ​ប្រជាជាតិ និង​ប្រទេស​កម្ពុជា​ទាំងមូល​រងនូវ​ការឈឺចាប់​ខ្លោចផ្សា ខណៈដែល​កម្ពុជា​កំពុង​តែ​ប្រារពពិធី​បុណ្យ​ប្រពៃណី​ជាតិ​ដ៏ធំមួយ​របស់​ខ្លួន ។

ជាងនេះទៅទៀត លោកស្រី កាតឺរីន តាស្កា (Catherine Tasca) សមាជិក​ព្រឹទ្ធសភា និង​ជា​ប្រធាន​ក្រុម​មិត្តភាព​បារាំង-កម្ពុជា​នៃ​ព្រឹទ្ធសភា​បារាំង ក៏បាន​សំដែង​នូវសមានទុក្ខ​ផងដែរ​ជាមួយ​សមេ្តច​នាយករដ្ឋមន្រ្តី ហ៊ុន សែន ក្នុងនាម​លោកស្រី​ផ្ទាល់ និង​ក្នុងនាម​សមាជិក​ទាំងអស់​នៃ​ក្រុមមិត្តភាព​បារាំង-កម្ពុជា ។ លោកស្រី​បាន​បួងសួង​ឲ្យ​អ្នករងរបួស​នៅ​ភ្នំពេញ​ទាំងអស់​ឆាប់ជា​សះសេ្បីយ ដើម្បី​ឆាប់​វិល​ត្រឡប់​ទៅជួបជុំ​គ្រួសារ​វិញ ។

Dernière modification : 24/11/2010

Haut de page